Inn ariv o milie lemwa, Zan ek so Madam met zot pous lipie dan sipermarse

Li get zong so Madam inn kariate, pann kapav al fer pedikir, so kont labank enn ledwa d’honneur inn montre

Li trouv dimounn inn atroupe dan rayon kot prodwi ki pe solde, bann zafer ki pre pou al perime, pou gagn enn ti rabe

Li pas kot labouzi ek sandal, li dir sa, bizin al alim kot Bondie, dir li protez so portmone

Li trouv pri bwat Corned Mutton Rs 195 so korn pouse

Li trouv pri sardinn li pense ki manyer li pe pez nene bwar delwil, li’nn fatige

Li trouv pri saumon, li senti enn rougay san pomdamour dan so trip pe vire

Li trouv pri diri li riy zonn, li trouv pri dentifris so lamaswar tonbe, so ledan ek so ti pitay gagn fre

Li pas dan rayon sirzele li gagn so, li trouve pri mouton san lezo li santi so zenou tranble

Li pas kot ourit, krevet, so figir vinn bomli, pwason sale, so lizie sorti gro, li dir so bidze, parey kouma laptop, pou eklate

Li trap pake poule, lakwis, pilon, hans, li senti so lerin pe kase, so larzan pe gagn lezel pe anvole

Li pas kot diber li dir ayo aster mo plime, li pas so sime, li glis trankil li ale

Li ariv kot reyon legim, li trouv enn pwavron kraz-kraze Rs 100, li dir res lor letazer figir soufler, li bien amerde

Li ek so Madam inn pran 2-3 zafer, zot pas lakes, gagn stres, zot transpire

Li trouv kont inn defonse, ti sokola ek ti kram-kram pa pou kapav paye, bizin retourne

Li get bill vini, boul dan vant ; Rs 2 000 fini balye, dir salam, bye bye, zài jiàn, namaste

Letan Zan sorti dan sipermarse, li’nn touni kouma Tarzan