Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi…

H : Toulézour ou tann zis samem. Mari inn asasinn fam ek galan, papa inn viol piti, enn inn met sat pandi, lot inn touy étranzé… Viré tourné mem zafer dan sa péi-la foutourrrrrr.

V : Ayo papa, pa kozé. Trist net sa madam ki zot inn tranglé Péreybère-la. É vizil ki zot inn arété la, li pé dir ki lapolis inn bat li.

A : Bizin dam li mem… Ki li ti lé, donn li enn méday ?

R : Wé ! É dapré sé ki mo’nn lir dan zournal, li pa enn anfandker ditou. Linn déza rant kot vwazinn tou ; plis lor la linn bat li.

V : Bé kouma linn kapav gagn enn plas travay vizil dan enn baz seryé koumsa ?

R : Pa kapav dir twa. Séki mo koné mwa, dan tou travay bizin prézant to moralité.

H : Bé bann-la, pa sir si limem kinn touy sa tifi-la. Pankor gagn rézilta tes ADN.

A : Pa vinn bav dan minn do. Inn gagn disan dan so sémel souyé ek dan so linz. Ki prev to bizin plis ki sa ?

«Baté randé napa fer dimal sa !»

V : Antouka, si limem sa, so dal napa pou kwi dan prizon… Bann la pou tir so manzé bien mem. Ankor si li enn violer zoto… (Zot tou bouz latet pou aprouvé)

A : Apré ki zot dir ? Moris enn ti zil paradiziak. (Avek enn riyé foutan) Alé alé, pou népli éna touris dan péi. Morisien pé vinn tro bébet. Zot pé gat limaz Moris.

V : Akoz samem éna Morisien pé anvi kit péi alé. Zot népli santi zot an sékirité isi.

H : Pa fini, éna dimounn lor Internet pé dir Moris enn «death destination» tou. Mari laont sa. Akoz enn mang gaté, tou dimounn pas pou mové.

V : Hé, bé zot pa krwar ti bizin introdwir lapenn kapital dan Moris…

A : Wiiiiiii… Ek tou séki pé arivé la, mo pansé li ti pou enn bon zafer sa. Bizin avoy tou sa bann bézer paké-la manzé

R : Sa ki li. Bizin introdwir lapenn kapital pou bann dimounn ki pé fer tro lékouyon dan sa péi-la. Bizin aret nouri zot léver… Pa kapav bef travay, souval manzé.

A : Alé alé, ki pou ariv nou ti zil Moris… Sa zis komansman sa. Nou lalwa pa asé séver. Zot tou pou fer kouma zot anvi.

Mo d’lafin

S : Non do, mwa mo pansé introdiksion lapenn kapital pa enn solision sa. Parski baté randé napa fer dimal !

Par Véyer ZAFER