Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi…

V : 36 milion papa… Pa ti kav gagn sa jakpot-la sa sémenn-la. Nou ti pou zoli garson la.

A : Hé, aret fié dizef dan vant poul do. Tan ki ou éna ou dé lamé ou dé lipié, pa bizin dépann lor nanyé ek lor personn apart oumem.

S : Pa dir mwa sa kantité kas-la pa fer twa révé ? Si nou ti gagn sa la, nou pa ti pou anba tabazi-la. Létan margoz fini la mann. To koné kot nou ti pou été la ?

A : Kot sa ? To ti pou frékant restoran ? Ouswa to ti pou aboné ar enn lotel 5 zétwal ?

S : Pié dan lo papi… La, nou ti pou pé kas enn poz dan nou prop vila, ti lipié lor gro lipié.

V : Wé, dir li S… Avek enn zoli ti trannsink. Ou plizier, si nou kas pé permet nou. (kas gran riyé)

S : É pa fini ! Nou pa ti pou bwar labier ou rom la. Ti pou éna zis bann bon zafer lor nou bar-la, kouma Black Label, Jack Daniel’s, Chivas Regal …

N : Zoto… Pa fasil ar zot zot. Zot gagn kas enn sel kout zot palé vinn fin. Selman mwa mo dir zot enn zafer, sa loto-la, bizin éna enn mari lasans lisien pou gagné sa.

S : Wé, sa li vré sa. Éna pé zwé par 5 000 -10 000 roupi par sémenn pa pé gagn nanyé, alor ki éna pé tous gro lo avek zis enn sel ti quick pick.

A : Zot dapré lord si zot gagn loto enn zour, mo sir zot pou vinn mari gran nwar. Zot pou népli konn kamwad é zot pou bliyé zot lamizer. Zot pou pet pli lao ki zot f..s (sansiré).

V : Hé, aret fer to gro poumon. Mwa mo dir twa, si enn zour nou gagn enn jakpot parey, tomem prémié pou vinn bat nou bis. Marké gardé.

N : Pa bizin diskité bann larmé. Si zot anvi vinn ris, pli fasil, al rod enn vié matant ki éna enn ta lakayas zot maryé ar li.

S : Wéééé… Apré osi dan vié karay ki éna bon lasos non. (Zot tou kas gran riyé).