Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi…

K : Sitiasion dramatik dan péi. (Soupir…)

I : Wéééé… Katastrofik net sa ton. Ou get tou sa bann zafer ki pé arivé La Butte ek Cité Barkly-la, léker fermal sa. Gouvernman inn avoy gro bouldozer pou kraz lakaz ti dimounn finn konstrir lané apré lané ek zot laswer.

A : Zot pa trouvé nou pé vinn koumadir enn péi diktater ar sa prozé métro lézé-la ?

K : Bé normal, nou pé vinn koumadir Corée du Nord.

I : Zot koné enn fam ki dir : «Mo sort dan mo lakaz, mo rant direk dan métro lézé.» Ki kalité sa…

A : Wé, zot inn kraz so baraz.

K : Bé dan Barkly bann-la inn kraz twalet ek sal-dé-bin enn fami. Kot zot pou al larg zot komision aster ? Pa konpran mwa. Gouvernman pa résoné inpé.

A : Si mo’nn konpran bien, sa bann dimounn-la inn mont zot lakaz lor térin bay. Dayer, bay-la fini expiré... Séki védir zot pé skwat térin léta. Mé sa pa zistifié violans bann otorité inn servi.

I : Wé, zot inn gété kouma sa bann lapolis-la inn tret sa bann fami-la. Malédiksion lor zot…

A : Lapolis sipozé défann lapopilasion… É non pa azir ek violans. Bien trist pou enn péi démokratik kouma Moris. (Enn ti silans)

K : Sel kestion mo tia kontan poz sa bann lapolis-la mwa : Si ti zot fami ki ti trouv lor sa trasé métro expres-la, eski zot ti pou al tir bann-la dan zot lakaz ? É sirtou eski zot ti pou azir ek violans koumsa ?

A : Mo sir si ti enn minis ki ti res lor sa trasé-la, mo pa krwar ti pou kraz so lakaz. Si falé, zot ti pou rod enn lot solision.

I : Gouvernman ti bizin fer trasé-la lor simé nef. Lerla pa ti pou bizin kraz lakaz ti dimounn.

A : Mwa mo pansé sé enn kouyonad sa prozé-la. Pé zet larzan par lafnet plito. Dan enn ti lil kouma Moris, métro pa néséser sa. Ti kav fer lézot zafer pou déblok sirkilasion.

K : Pa métro enn merd sa, tram sa. Dapré lord gouvernman mem pa pé koné ki métro ki tram. Dayer, prozé lamem pa kler. Trasé lamem mo pa koné kot li komansé kot li fini.

A : Gouvernman lépep pé lager ar Langléter pou bann Sagosien régagn zot later, apré isi zot pé ras later bann Morisien. Samem ki apel lépep admirab sa ! Enn ta yap yap pou nanié.

I : Mwa mo dir dimounn ti bizin maryé piké désann lor sémin. Donn zot enn bon koreksion. Pa zis dimounn konserné ki bizin manifesté, tou Morisien bizin korpéré lamin dan lamin…

A : An tou ka, bann dimounn pou gard enn mové souvénir sa prozé-la. Tousala akoz enn bann batiara ki pa konn gouvern péi. Get kouma minis linfrastriktir, enn zournalis ti intéroz li lor sa bann zafer ki pé arivé dan péila, li amenn rol sinwa nef li. Li dir : «Monn fini travay. Les mo al lakaz.»

I : Li ek so Prémié minis linpos bizin lev paké alé si zot éna ankor inpé lamourprop dan zot…

<div style="background:#eee;border:1px solid #ccc;padding:5px 10px;">
	<p><br />
		Mo d&rsquo;lafin</p>

	<p><strong>K : </strong>Li sinp sa&hellip; Nou éna dé swa : swa popilasion désann dan lari donn sa gouvernman-la enn bon koreksion, swa lopozision démisioné an blok. Lerla pou bizin réfer éleksion. Madam Maya Hanoomanjee pou arété dir<em> &laquo;I order you out&raquo;.</em> Zot mem ki pou bizin out, kout pié dan f&hellip; (sansiré).</p>
</div>

<p></p>

Par Véyer ZAFER
 

Une publication du quotidien BonZour !