Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi…

G : Enn lavi sa ? Gramatin tanto to tann sa ti famla kriyé. Gagn baté kouma bef foutourrr… Mari-la éna so lamé les.

S : Kisann-la, to vwazinn fek maryé-la ? Mo ti kwrar lamour fou… Zot pa fek gagn enn zanfan la ? Ki pé arivé ? Enn lané maryaz pankor gagné pé fer koumsa ?

G : Wai do, avan maryé tou ti korek. Zom-la inn bien konn pas diber ar tifi-la. Aster linn tir so laké.

Z : Zot pa konn zistwar zot. Kapav fam-la pé manz banann dan dé bout samem mari-la inn vinn koumsa.

G : Pa enn rézon pou ki fam-la sibir tousala…

S : Mo dakor ar twa G.. Mo konpran zot finn pran enn langazman enn anver lot kan zot inn maryé. Mé sa pa védir ki fam-la inn vinn enn dibien ki zomla kapav maltrété kouma li anvi... Eski li finn déza démann led dimounn pou tir li dan sa trez-la ?

G : Bann vwazin finn dir li al lapolis. Mé li pa lé so mari gagn case gard akoz so baba.

«Avan maryé tou ti korek. Zom-la inn bien konn pas diber…»

Z : Mwa mo dir pa tro bon rant dan zafer dimounn, linz sal lav ant fami sa !

S : Dan bann ka koumsa fer gagn sagrin ki akoz enn zanfan enn fam bizin met so lavi an danzé. Enn mari sakrifis sa. Zordi dimé to pa koné ki kapav arivé. To net trouv lapolis pé débark kot vwazin. Lerla inn tro tar. To pa finn kapav sov sa fam-la.

 Z : Mé an mem tan, dimounn dir twa ki to bizin vey to zafer. Parski si to intervénir, to lev ek mari-la, kan toulé-dé rékorek, lerla twa ki pas pou mové...

G : Sa li vré sa. Apré, twa ki pou anplis. Mé selman li tris pou sa zanfan-la osi. Grandi dan enn lanvironnman koumsa li pa évidan ditou.

Z : É, mo fer zot koné ki sé pa zis fam ki gagn baté, zom osi gagn so bézé. Enn ta Lélet éna dan Moris. Kan éna kafouyaz dan ménaz, zis fam ki gagn protection order. Mé zamé mo’nn tann dir enn Antoine inn gagn protection order kont so madam.

S : Bé normal ! Dapré twa, ki zom pou al dir gard so fam bat li ? Pou li enn mari laont sa… Dimounn ki pou dir ? Zot aksepté pez néné bwar délwil.

Z : Mwa mo dir bann zom bizin pa per pou dénonsé. Bliyé laont. Aster éna légalité bann sex. Zot bizin pans zot prop sékirité.

G : Selman, éna kapav per ki zot fam bat zot plis ankor si zot al dénons séki zot pé sibir. Tousala éna. Zamé pa kapav koné ki pé déroulé ekzaktéman.

S : Parfwa to kalkilé, éna inpé bez la… To kapav krwar to bien konn enn dimounn, pansé ki li kontan twa akoz linn aksepté fer so lavi ek twa, ler gété, fos larout net.

Mo d’lafin

G : Wé, to éna rézon. Samem ki dir : sakenn so sans… ou so malsans. É pa krwar to kapav konn enn dimounn par ker. Zamé ki apel zamé to fini konn enn dimounn. Zordi li mouton, démin li kapav lion.