Avek sa pandemi-la, ki bisin swazir ant lekonomi ek lasanté piblik?
Pou ki lekonomi marse, bizin travayer e travayer ki bien… pa Covidpozitif. Si travayer malad ouswa dan karantenn ouswa dan zonn rouz, lekonomi pa pou marse. Donk priyorite bann priyorite se lasante piblik.

Enn swa cornelien, sa – kouma dir bizin swazir ant lar ek kilti?
Ki ou dir? Eski ena swa ant lar ek kiltir? Tou depann lor saki nou konpran par lar ek saki nou konpran par kiltir. Pou mwa, lar se bann mwayin ki nou servi pou transmet bann lide, bann obzervasion lor saki pe pase dan nou lanvironnma, bann analiz, bann mesaz a tou bann dimounn dan lasosiete an zeneral. Nou exprim nou lide atraver diferan disiplinn : teat, sinema, lapintir, skilptir, lamisik,etc. Kiltir li inpe pli vast, li anglob lar, koutim enn sosiete ek sirtou manifestasion reliziez enn sosiete spesifik. Mo plis pou lar ki mo finn defini lao-la. Dan Moris, minister fer boukou amalgam kan koz lar ek kiltir ek li met boukou lanfaz lor relizion. Mo panse ti bizin ena enn minister Relizion ek Socio kiltirel ek enn minister Lar. An tan ki artis, mo finn gagn boukou problem pou zwenn bann ofisie minister parski depi koumansma lane zot okipe ar Sankranti, Cavadi, Fet Printan, Maha Shivaratri, Pak, Ougadi, Ramadan, etc. Mo sagrin sa bann ofisie-la.

Enn ansien minis pa ti konn diferans ant lar ek kiltir. Kifer nou bann minis de la Kiltir dan dife pou la plipar?
Kan nou get dimounn ki ti nome minis Lar ek kiltir depi Lindepandans, mo kapav dir ki zis enn ou de ki ti kiltive. Lezot finn swazir parski pa ti ena plas pou met zot ouswa akoz zot reprezant enn kast spesifik. Ena minis zame finn al teat dan so lavi. Si zot pa trouv kikenn, zot al pran enn ninport met la. Parfwa zot mem zot avwé ki zot pa konn zot travay. Ena enn ladan finn fer mwa rann mo meday Repiblik telma li ti enn inkapab, pou pa dir ki li enn inkilt.

Pou revinn a konfinnman, kouma ou viv sa personelman?
Nou pe viv enn sitiasion difisil ek konplike, nou tou dan enn irzans saniter. Mwa, antan ki artis, mo bizin adapte mwa ek sa sitiasion-la ek debat ansam ek lezot konpatriyot pou ki nou tou sorti gagnan dan sa konba-la.

Monn deza zwe dan bann kondision difisil ki pa parey kouma dan Moris. Donk sa sitiasion kot nou été-la, mo pou fer fas. Antan ki Morisien ek antan ki artis, mo panse ki nou bann dirizan (gouvernma ek lopozition) ti bizin met zot ego ek zot gros tet dekote ek vinn ansam travay pou lintere lepep Moris. Gouvernma ti bizin fer apel a bann dimounn kouma Dr Gujadhur, Dr Caussy ek lezot ki dan prive pou ki zot tou don enn koudme olie ki sakenn al koze sakenn so kote. NOU DAN ENN IRZANS SANITER. Pou tou respe ki mo ena pou Dr Gaud, mo pa trouve ki li fer laba…Gouvernma ti bizin fer premie pa. Aret res dan lakwizinn. E.g. Ki sann-la finn konsey Premie Minis dernie fwa ki li ti vinn lor TV?

Ki limpak li ena lor ou bann prozé téat?
Mo ti pe repet enn pies Umar Timol, La conversation, ek nou ti ariv bien lwin ek repetision. Malerezma nou finn bizin aret tou. Me apre reflexion nou finn deside repet online a traver WhatsApp(Aaa teknolozi) e mo bizin dir sa pe marse. Enn zafer mo ti aprann lekol… Necessity is the mother of invention.Sinon mo pas mo letan lir, ekrir, TV, fer lexersis e ousi fer menaz… Ha…Ha…Ha

Kouma ou trouv Moris ou bien Morisien pe sanze apre sa 2e confinnman-la?
Sa pandemi-pe fer nou viv enn sitiasion bien difisil. Malgre ki mazorite dimounn pe swiv bann konsign saniter, ena enn minorite (e sa ki danzere) (bann latet brile…bann KOKOVID) ki pe fann sa viris-3la partou. Teknolozi pe fer dimounn kre sikoz. Sa pe fer bann Morisien vinn alarmis. Nou pe vinn viktim bann roder bout, bann merkanti. Pandan sa peryodla,!gouvernma ti bizin zel pri tou bann lartik e pourswiv bann refracter.

Eski lavie pou sanze pou de bon?
Wi ek non. Osito nou resi kontrol Covid, lavi pou retourn a la normal. Mo rapel lepidemi polio, lager Golf, tou finn retourn a la normal apre.

Eski sa ki pou ariv inspir ou pou ekrir enn lot pies?
Pa zis Covid ki inspir mwa, me tou saki pe pase dan lemond… a LIMANITE.