À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Azordi mo pou koz lor enn topik

Atraver enn zistwar trazik

Ludovik enn ti garson fantastik

Bien sik

Sorti dan enn lil tropik, zanfan lafrik

So ti seve afro pik pik

Li ena enn don artistik

dan lamizik

Sega tipik se so trik

Me malerezma

Avek move frekantasion

Lin al tom dan piez tantasion

Mo dir twa mari bez sa mo nasion

Nek kontan swiv so bann friend

Apenn inn gagn laz li al integre enn

Lekipaz ki sovaz, kouma enn ban yen

Dan pe rod montre ki li enn vre man

Li al rant dan yen sering

Zordi li pa mem ena lizienn

Ni li ena inpe zen dan li

Tou sa bann zenn

Saken enn sel sereng dan lavenn

Swadizan ena sa dan zot zenn

Fann disan ena risk gagn infeksion

Atas ar legan rise apre fer inzeksion

Lari pou trayir zot kouma zida

Zot deza dan lanfer ladrog aster

al trap sida

Dan plas sa kalver li ti bizin parla pe

bat sega

Li ape travers enn martir pena sorti

de la

Li mem linn admet

Ki so latet zepeng

Li met so fami dan lapenn

So ti topet Coughen

Li fer so fet lasemenn

Li admet dan wikenn

Cocaïne, codéine,

Pran sa kouma pe pran vitamin

Dans so lirinn inn gagn tras

amfetaminn

Snif brown sugar, non pa disik sa

Bat dan latet fini dan brown sequard

Tchkk... mari patetik sa

San so bann demars li koumans gagn

enn bann tik li fer koustik

Pou gagn so ti plastik simik

Zis bann zafer toxik ki gagn dres so ti

problem teknik

1, 2 fwa monn sey kominik ar li

Rod explik li pou li kapav gagn

enn deklik

Me li kouma zako dan lamizik

Dan so latet mo pe kritik li mo pe rod

konplik li

Mo dir li Dovik, mo ti konn twa dan

tektonik, dan disko man

Zordi tonn vinn enn toxikomann

To pe bez to psiko man

Fer 2 zour to ar mem triko man

Moris inn vinn wadir Mexico man

Fer enn bon lepok ki

Ladrog an vog

Komie pe eskroke pou zot droge

To pena lizie to pa trouv divan to pou

al penalize

Dezidrate, to disan inn sek

Megri, tonn vinn kouma enn sipek

Perdi lapeti, manz zis sigaret

Ladrog linn vinn kronik

Zenes inn adik a pe gro nik zot servo

Enn ta pares pe res anplas, pe kouve

dan zot nik

Galoup derier zot doz koumadir enn

lekours ipik

Ziska zot bez overdoz

Monn kas enn poz monn koz ar li

Me si monn bien fer mo matematik

Piti la inn fini perdi so lozik

Sa pa fer mwa sirpriz

Si dan so latet nepli ena matier griz

Li anplin kriz

Maler inn pran li dan so lanpriz

Pou Ludovik, simik

Samem so posion mazik so tonik

Kouma poson li naze dan enn ladig

de fatig

Amen lavi koson linn mem devlop enn

ban manier sadik

Ludovik inn vinn sik ar sa

Ki so lasante fisik

Ki so lasante psikolozik

Li enn pasian de sa maladi

epidemik-la

Li inpasian gagn so lot doz simik

Pas pli tar ki so landime

Mo trouv Ludovik

Pe kime lor sime

Pa kone kinn fime

Li fer enn bad trip,

mo gagn enn panik atak

Li pe rann so trip, so leta kritik

Transport li lopital, pou li pena klinik

Mo krwar samem so dernie trip

So fami dans toupi pou vinn get li

Me…

Ludovik inn fini par trouv enn lafin

trazik

Ena boukou ki fabrik sintetik

Ena boukou ki inplik dan so trafik

Parski ladan gagn boukou frik pli vit ek

pli fasil

Me ki pli komik, zot ape pratik zot ban

trik an plin piblik

Mo dir twa mari pratik

Koumadir ape pran 1..2 lartik dan

laboutik

Bann ki pe trik dimounn, les flics ne

voient pas

Pe bizin enn lekip sinser, dinamik

Ki sir-sir pou okip sa bann ka-la

Lalwa pa aplik zis pou bann kinn adik

Methadone kouma enn medikaman

Enn metod ki donn zis soulazman

Be kan pou aret sa bann gro beta bann

don ki pe touy nou ban zanfan

Inn ariv ler leta donn enn bon sistem

pou konbat sa pandemik la

Ansam nou bizin protez nou bann

zanfan

Simik nou pale

Ladrog nou pale

Bio

Pouvalen Pereanen

Ce Flacquois de 21 ans est un slameur et poète en herbe. Il est déterminé à partager ses réflexions à travers ses rythmes sur une multitude de sujets. Il a remporté la deuxième place de la quatrième manche de la Ligue de slam de l’Institut français de Maurice en mars.