Fodé pa ou moustas drésé kouma kamaron. Mé Minis Prins, dans plas ou al montré dimounn kot sinwa plant pétar, éna lézot zafer pli inportan ki ou ti kapav fer, Misié.

Parski kan nou trouv tou sa bann gro milion-la pé al dan pos bann gro rékin, nou brushing kasé, sévé vinn kouma karo ditin. Nou disan bwi kouma dal lor difé kan nou pansé ki sé nou pitay ki zot pé gaspiyé, kouma dir tiyo CWA inn persé. Misié Me Rs 19 millions pé galaxsité, bef travay (laké) souval manzé.

Zot pé lager akoz sipaki Heritaz Cité ki finn mor-né, pandan ki éna dimounn ek so piti péna fourous pou asté manzé. Zot al tchaké dan gro loto, nou nou bizin servi nou B11 ziska savat léponz inn izé. Lafin di mwa, labank plis nou kouma zourit parski nou andété. Kan ariv lé 10, nou portmoné get nou riyé. Zot pé rod fer bourik manz lazlé.

Pa gard nou dan zwin mé ou ek ou bann kamarad enn bann fit dan badia. Ton Paulo li, li pé pas diber ; ti mama li amerdé, ti mama li koz-kozé, li riy-riyé. Lérwa lion pé pansé nou finn bliyé so bann kof-for ek tou so bann biyé.

Bé nou touzour éna problem dan nou plantasion pétar. Lot kout pou kisana pou al voté ? Antouka, enn-dé deryer pou bizin boté, ki ou pansé ?