Tann dir to pé touy ti kopinn

Permi to péna mé to pé roul gro gro masinn

To ferfout mem si to al fini simitier Les Salines

To kontan met nisa,

Sé to laz nou konpran twa

To fat yen, to konsom bat dan latet

Eski to’nn pansé ki to lavi kapav fini bet ?

To lager ek to paran pou gagn soulié Reebok,

To bien merd mem si dimé la fami bizin bat lamok

To zour to mama, respé inn disparet dépi to vokabiler

Enn zour kan li pa pou la to pou dir get sa ki mo’nn fer

Dan bis to déklar mari

Kan to gagn enn piti eski to pou kontan li azir kouma enn abriti ?

To pa réaliz sans ki nou éna, nou finn né dan paradi

Éna péi kot dimounn éklaté kouma pétar, fini an Konféti

Proféser dir twa aret fann kaka

To pas li enn klak, to pli koné ki li twa

To’nn aret lir liv, to népli gagn létan

To préfer al lor Pornhub, li pli eksitan

Tansion to krwar nou pé rod kritik twa

Mé léker fermal kan trouv twa koumsa

Alor, pa gat to prop makaroni,

Pran li dan to lamé, to ti lavi

Akonpli to rev, montré zot ki éna dan to vant

Kan to éna volonté nannié pa pou kapav vinn ant

Tras to larout, lévé, dibout,

Montré ki to pa dakor ek bann roder bout

Manz ar li mwadka

Pou ki dimounn aret dimandé : zénes, ki pé ariv twa ?