Sé enn esklizivité. Mo Gro News : enn Morisien finn al tal lamé l’Inde, li finn gagn Rs 18 milyar prété. Chek détay pli ba.

PJ Imposte, sé enn ti Morisien ki res La Caverne. Mo Gro News finn aprann ki li finn al sakouy so lamok dan l’Inde. La semenn dernyer, li finn pran avion avek so katora stainless steel dan so poss langouti. Ti éna enn chihuahua, ek so linz sifoné, ti pé akonpagn li.

Ler linn ariv laba, li finn rési zwen so mantor, Misié Modi. Toulédé byen kontan ramass salté pou gard lanvironman prop. Li finn explik Misié-la ki li bizin enn ti kass parski voler ki met kostim ek ki roul gro loto finn pass ar so lakess.

Pou sédir Misié Modi, li finn donn li enn kart postal kot éna enn zimaz Agaléga an kado. PJ Imposte finn dir : «Sa pou ou.» Bann Indiens finn dir «bahout bahout joli». Misié Modi finn dir PJ : «Aa Gale Lag Jaa.» Pou bann ki pa konpran hindi savé dir «vini mo ser twa dan mo lébra». Lerla, Misié Modi finn désid pou donn li enn loan Rs 18 milyar.

PJ finn rétourn Moris, li dir li byen kontan. Mo Gro News finn aprann ki sé bann Morisien ki pou bizin ranbours sa kass ki PJ finn pran prété-la. PJ dir li pa mind mem si li gagn kout boul kass kot, li byen kontan li kass paké.