Tini ferm ti Madam, twa ki netway twalet pou Rs 1 500

Éna ki pé asizé lor zot tronn, pé get twa koumadir to enn mandian

Sa konba-la, sé pou to zanfan ki to pé amenn sa, dir zot pa ploré

Pou ki dimé zot napa dormi san manzé, to aksepté ki to vant kriyé

To léker sirman pé séré, kan to get nouvo avion ki pé pasé dan lésiel

Twa parfwa to pé kont kass pou asté enn paké disel

Kouraz ti Madam, pa sédé, éna enn zour ki apel dimé

Lavi rékonpans bann séki persévéré

Twa o mwin to napa pé kokin, to éna to dinité

Bann gran palto pé kozé koumadir zot koné ki apel la povrété

Kouraz ti Madam, to lestoma pé gronié, to pé gayn ner, per

Bann gran palto pé al manz bel bel manzé, restoran, bifé ouver

Éna ki pé asizé bez nou kass

Pé tir lalang, pé rod révolver, tret fam dé femel lisien mé pé ress anplas

Éna pé dir li foupamal ar twa, kozé koumadir batiara

Fossdan kapav anvolé telma li pé arazé

Lot-la so parabol pa pé tro kapté

An fet, zot rod prétex paski zot anvi ferm lizié

Pran kouraz ti Madam, lot kout nou pou rapel zot larogans, zot toupé

Nou napa pou blié tousa linzistis-la kan lot kout nou pou al voté.