- Ki to pé fer, to pa lé vinn avek mwa fer inpé shopping?

- Mo ti pé ... hein...heu... Ok.

- Nou al Rose-Hill. Lontan nou pa’nn al Rose-Hill ansam.

- Ok korek. Mo tir loto touzour.

[20 mins plus tard]

- Arété, arété... aret la mem!

- To pa dir mwa nou pou al Rose-Hill? Pa ankor ariv Rose-Hill la.

- Dan sa bann magazin isi-la ousi parfwa to gagn bann bon lartik. Nou kapav aret lamem nou mars-marsé.

- Ok, si to pé dir...

[Dans le magasin]

- Sa rob-la, ou éna so pli long?

- Wi, enn ti moman mo améné. Ou kapav éséyé, kabinn isi.

[Après l’essayage]

- Ou éna séki pli kourt?

- Wi, mo améné la.

[Nouvel essayage]

- Séki pli larz?

- Wi, mo améné la.

[Nouvel essayage]

- Séki mwin larz?

- Wi, mo améné la.

[Nouvel essayage]

- Séki san lamans?

- Wi, mo améné la.

[Après nouvel essayage]

- Séki avek lamans?

- Premié lamem ti avek lamans.

- Wi, Wi, mo pé get li la... Ou péna lézot kouler?

- Wi, éna so rouz, gréna, blé, ver... Mo amenn tou mo vini la.

- Wi, amenn tou.

- [Mo trouv sa kouler-la mem bon mwa.]

- Wi, mo pa dir twa li pa bon. Bé si mo pa get lézot kouler kouma mo pou koné ki limem ki pli bon?

- Sorry, mo pa’nn dir nanyé.

[Regard compatissant du salesman qui est revenu surchargé de robes de toutes les couleurs. Entre hommes on se réconforte comme on peut.]

- Alalila madam, samem tou kouler ki nou éna.

- Si mo pran sa gréna-la, ou pou éna so sintir mem kouler?

- Non, pou blé-la nou éna, ek ver-la nou éna. Pou gréna-la, ou pou bizin pran sinter kouler nwar.

- [Nwar enn kouler ki al bien lor gréna sa. Pran samem.]

- Wi, selma mo soulié dan enn ton ver, mo pa kapav pran nwar lor gréna lor ver.

- Bé pran ver mem alor.

- Bon, ki pri ou pé dir mwa-la?

- Sa li dan lé Rs 2 499. Pou ou kapav fer li Rs 2 490...

- Ki, Rs 2 490? Non, les li.

- [Wai, li tro ser, nou alé.]

- Rs 500 mo kapav donn ou.

- [Sink..sink-san roupi... Nou alé, nou alé, to pé fer mwa perdi pwin-la.]

- Madam, sa pri-la pa vandé sa. Alé, donn Rs 2 200 ar ou.

- Non.. Rs 550 mo donn ou.

- [Hey si to pou dir pri ridikil la, mo pé al atann déor mwa hein!]

- Alé Rs 2 000 madam.

- Rs 575 bon la.

- Pa pou kapav.

- Mo pé alé alor.

- [Nou alé nou alé... lot kou pa dir mwa vinn fer shopping ar twa.]

- Madam atann, ki pri ou dir?

- Rs 600.

- Mo bes ziska Rs 1 800.

- Rs 625.

- Madam mo pé donn ou pri asté mem la... Alé Rs 1 500.

- Rs 650.

- Ok, Rs 1 200.

- Rs 1 200 korek.

- [Ok, pran li nou alé. Zamé mo pou révinn dan sa magazin-la ankor.]

- Non, nou bizin get enn lot magazin avan nou pran, tansion éna ki pli bon laba.

[Dans le magasin d’à côté]

- Sa rob-la, ou éna so pli long?

- Wi, enn ti moman mo améné. Ou kapav éséyé, kabinn isi.

[5 heures plus tard, après avoir visité tous les magasins de Rose-Hill]

- To koné séki nou ti gété dan prémié magazin lamem ti méyer...

- Ki to pé rod dir mwa? Asterla nou ré-marsé al ziska prémié magazin-la?

- Mo koné to pou vinn avek mwa parski to bien kontan mwa.

- Hérezman mo bien kontan twa.