GWANNTANAMERRA

Mo pa fer senn, mo pe koz vré;
Dan mo pei pié koko krent;
Mo anvi avan ferm lizié
Santé for-for mo nam ansent.
Guanntanamerra, guajira Guanntanamerra.

Parol mo santé zot ver tann,
Zot osi kouler larkansiel;
Parol mo santé zot pa rann,
Zot fer leker mont dan lesiel.
Guanntanamerra, guajira Guanntanamerra.

Dan mo zarden ena roz blan
Depi Zanvié ziska Desam;
Zoli fler pou nou bann zanfan
Ki saryé inosans dan nam.
Guanntanamerra, guajira Guanntanamerra.

Mo mars ar dané lor later
Mo’nn pik mo latant dan zot kan;
Mem bann pli tipti larivier
Zot pli zoli ki losean.
Guanntanamerra, guajira Guanntanamerra.

DOMESTIK LWAYAL

Mo domestik mari lwayal;
Li satisfer tou mo dezir;
Pran mwa bien kont, zamé li tir;
Grasa li, mo siksé donn bal.

Mo domestik zamé li fel;
Li pa manzé, li pa dormi,
Ousa plengné lor so lili
Kan ena pou reponn lapel.

Kan mo sorti ala li rann,
Swiv mwa partou kot mo eté;
Ler revini li desidé
Pou ofer mwa enn tas lasann.

Kan mo levé dan gramaten,
Ala li la kot mo lili;
Kan mo pe ekrir mo lavi
Se so disan ki fer refren.

Mo domestik? Pa kwar li bet
Mem si so marsé fer tapaz;
Fer per, fer kontan dan so baz:
Mo domestik se mo skelet.