Ti Morisien lévé gramatin li rétrouv li enn sel kout dan Camp-de-Masque

Bel-Ombre virus pe plané kouma dire lépé Damoclès lor so latet,

Li gagn sok, on diré linn gagn kout Bambous lor so ledwa

Li bat dan abriti, pa koné ki pou fer, li pa anvi fini Baie-du-Tombeau, li gagn per, L’Avenir insertin

Li koné zafer-la difé, ena boukou kamarad inn perdi travay, zot Cap-Malheureux, pa pe fouti nourri zot fami

Dan so frizider kraz-krazé, dan so ti Cottage, res zis enn morso laviann, dan so bifé ena selma enn Petit-Paquet la farinn

Li fouy dan Fond-du-Sac, li pa trouv biyé, li lor la Pailles

Li abitié fer Quatre-Bornes, sak zour, pou li tras enn ti bousé manzé

La kouma li pou fer, li pou bizin fié lor la Providence

Mé Ti Morisien pa zet z’arm, li enn batan, li koné parfwa lavi eg kouma Tamarin

Li mont lor enn Roches-Noires li get lésiel Gris-Gris, li koz ar lao-la

Li pran so kouraz, li désid pou manz ar li, li dir non, pa kestion, li pa pou fini dans Trou-Kanaka

Li  pran so mal an pasians, li gard lé moral, pou so fami, so zanfan, so péi

Parski kouma tou Morisien li ousi li toulétan gard L’Espérance mem si li Trébuchet

- Ceci est la suite du texte paru en 2016 : (https://www.lexpress.mu/blog/277600/homaz-ti-morisien) -