Combien de femmes faut-il pour faire un homme ? «Nou langaz, nou later, nou kominote…» Pe tann zis sa depi arestasion dan Côte-d’Or. Ek eleksion osi li pou ale koumsa mem. Me nou limanite kot finn ale? Mo finn trouv enn video lor enn rankont ki pe defann zot kominote, zot kiltir. Pli boukou zom. Fam ena enn-de par-la. Li parey pou enn ta renion kominal. A be, kot to piti, kot to kominote pe sorti? Kot tomem to pe sorti, kifer to pe kav koze zordi? Dan vant mama. E sa kominote-la ki apel fam, ki plis ki lamwatie popilasion li pa bizin repre- zante? Kifer li li pa gagn later akoz touletan zom ki proprieter ek dibien pas de zom a zom? Fam kifer li bizin al res kot belfami? Fam li pena later li. Li nek seme. Pou anzandre to piti, twa zom ki pou donn so nom. Fam li pa rant dan kalkil etnik. Li pa rant dan politik, sof kan bizin li. Fam li res lakaz. Tansion enn lom pe get li. Me si nou anvi fer li dan fason Moris, kot ena zis bann ki pe protez zot montagn… ben fam ti pou vinn Premie minis, larenn Everest. Lamwatie popilasion zot finn blie. Pena fam lor biye labank. Ou kone kifer? Parski fam pa konte.