À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Lar li enn vwayaz san fin,

Nou trouv bann ansien, bann nouvo dan mem sime.

Enn lekor ki vibre, ki respire, ki sanze,

Enn sime ki nou partaze.

Bann ansien, bann pilie solid kouma bann pie,

Zot lavi enn liv, ranpli ek lexperyans ek fierte.

Zot memwar ankre dan Nou memwar,

Zot parol kouma 1 stenn, ki batir bann fondasion.

Bann nouvo, bann zenn ki pran flanbo,

Anvi avanse lor la, ranpli ek foug

Zot krie, zot reve, zot dekouver lafwa,

Zot anvi briye for, zot anvi pran plas lerwa

Nou resanble kouma lam, dan sa vals kreasion,

Nou poz bann brik, pou batir la nasion.

Kouma Lalinn ek Soley, ki ranplas zot zour,

Nou partaz lalimier, dan larmoni ek lamour.

Zot dir lavi enn sik, ki toultan tourne

Nou resanble kouma mozaik, dan sa gran four.

Enn lar ki grandi, ki transforme

Kot ansien ek nouvo zwenn

Nou trouv linpiration dan bann tras zot pase,

Enn partaz konesans, enn trezor divan nou lizie.

Nou aprann de zot erer, de zot sikse,

Nou kree nouvo zenerasion, ki pou vinn inspir lezot.

Parfwa, enn zour nef, li pa komans fasil,

Bann zenn sime tortire, inpe difisil.

Me avek gidans bann ansien, zot trap laflam,

Zot aprann manier, zot trap so bon lam.

Sa lanmou lar, nou partaze nou kiltive,

Li travers bann baryer,

bann limit,

nou devie.

Nou trouve enn linite, dan diversite,

Kot ansien ek nouvo, fer lar prospere.

Dan tou letap, nou respe bann ki finn vini avan,

Nou kree, nou inove, me nou pa bliye zanfan.

Zot lavi, zot rev, zot dezir nou ranpli,

Enn lasosiasion sakre, ki fer lar vinn eternel.

Nou lev nou lavwa, nou reini pou kree,

Nou batir, nou inspire, nou kontign avanse.

Nou sime kapav lon, parfwa dan bez dan nwar parfwa kler,

Me ansien ek nouvo, nou toultan marse san per.

Selma li osi domaz

Ki nou dir ki lar enn leritaz,

enn flanbo ki pase,

Depi bann ansien ziska bann nouvo,

enn tradision ki zame bizin efase.

Me deryer sa sourir, sa akolad, fasad,

Defwa kasiet enn ipokrizi,

enn teat lonb ek maskarad.

Bokou ki zot diskour bien rode,

Ki poz kouma mantor, gardien laverite.

Me zot konsey, zot lasenn, leson degize,

Frontier invizib inn mir ek prezize.

«Fer koumsa, fer koumsa», zot dir ek lotorite,

«Respekte kod, pa devie depi lalimier.»

Me sa lalimier-la enn dife ki bril nou lezel,

Anpes bann nouvo ekrir zot prop ritournel.

Nou, bann artis, bann odasie, bann afame kreasion,

Nou anvi kas sa lasenn, refiz sa dominasion.

Parski lar enn kri, enn souf liberte,

Enn lespas san limit, enn losean posibilite.

Sertin pres lotantisite, me maske zot laverite,

Anfwi anba lorye, sekre, laverite kamoufle.

Ipokrizi drape dan kostim respektabilite,

Me nou trouv kler, dan sa teat vanite.

Aster nou artis nou bann ki pa per pou pran parol

Nou lans nou prop revolision,

Parol kouma zarm, vers dan ebilision.

Nou pa pou vinn kopie, refle pal ek fad

Nou bann kreater, rever, vagabon nomad.

Tann nou lavwa, nou kri revolt,

Nou pa anvi personn so tronn, so medayon.

Nou anvi zis res lib, otantik ek vre,

Dan sa lemond lar, kot ipokrizi bizin sede.

Pou bann ansien, nou dir mersi,

Pou enn bann nou dir osi adie,

Nou tras nou sime, anba enn lesiel odasie.

Parski lar pa transmet kouma enn sinp ti tors 4 pil

kinn fini ki nou morde kraze,

Li anflame, li reinvente, li forze

Vwala mo slam, mo kri laverite,

Enn omaz pou lar, pou so pirte.

Ki bann ansien ek bann nouvo zwenn

Ki bann gro ta papie administratif ki pran 1 siek pou ranpli

Ki bann fos scheme ki get figir pou done me ki lor papie

paret zoli

Aboli e nou avanse

Dan enn lespas respe, kot sakenn trouv so sime.

Ki nou resi fer kree enn zoli memwar enn zoli baz enn

zoli lar

Ki pou res dan letan

E ki kone enn zour pou fer la Une de bann fitir zarboutan

Bio

Le Penseur Ébène

Poète, slameur, rappeur, conteur et fondateur de la plateforme SlamUp Poésie, Stewelderson Casimir est impliqué dans l’organisation de scènes de slam dans l’océan Indien et d’ateliers. Il découvre le slam à l’âge de 15 ans, influencé par le rappeur français Kery James et Grand Corps Malade. il a un album à son actif, intitulé «Gran Nwar».