À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Dan silans mo leker mo resers twa

Dan silans mo leker mo reklam twa

Twa ki konble mwan, twa ki la pou mwan

Twa ki fer tou pou mwan, twa ki kontan mwan

Twa kinn donn lemond so form, twa kinn kre nou an nonb

Twa kinn fer soley, twa ki fer mervey

Twa kinn fer lizour, twa kinn kre sak zour

Twa kinn kre later, twa ki anbeli nou latmosfer

Twa kinn fer nou gagn ler, parfwa gagn inpe saler

Twa kinn met mwan dan lazwa,

ZIS TWA kinn resi fer sa

Se pou sa mo resers twa e se pou sa mo reklam twa

Dan pli profon sa silans… sssshhhhhuuuuuttttttttt…

Mo tann to labriz

Enn proteksion anver mwan kouman enn parabriz

Mo santi mwan sou to lanpriz

To ranpli mo lavi avek sirpriz

Anbal mwan dan lazwa kouman dan valiz

To lamour dou, kares mwan kouman disab fin desann dan tamiz

Krwar mwan, sa pa enn deliz

Parski Twa… kinn resi ini nou dan mem legliz

Viv pou twa, sant pou twa, loue twa, Rann twa gras

Dan mem silans, to vizaz reflekte kouman dan laglas

Tonn overlimite batman mo leker

Wow Extraordiner

Tonn refrwadi mo lasaler ek resof mo freser

Wow Spektakiler

To prezans amenn enn kantite lafors

Mo azite kouman enn toro feros

Mo lafors double kouman kolos

Mo vinn pli red ki enn ros

Mo santi mo drwat vinn enn sel ek mo gos

Pli mo rann mwan tipti pli to grad mwan kouman enn Boss

Pourtan, souvan mo pann krwar dan twa

Souvan monn panse tonn abandon mwan

Souvan monn ankoler ek twa me kan mem sa tonn pardonn mwan

Mo anzenou e rabes mwan devan twa, s’il te plait aprann mwan

kouman viv pou mo grandi

Mwan kinn indiferan, aprann mwan ede ek protez bann tipti

Mwan kinn flate mo enan tou, tonn aprann mwan siporte perdi

seki inn presie dan mo lavi

Ek tonn montre mwan apresie tigit ki mo enan pou mo pa blie kot

mo sorti

To pouvwar depas mo limazinasion

To pwisans li trouv dan nou konviksion

To parol li port to benediksion

E lekselans nou retrouv li dan to Saint Nom

Dan silans mo leker mo resers twa

Dan silans mo leker mo reklam twa

Dan pli profon sa silans… sssshhhhhuuuuuttttttttt…

Zot tande…? Mo tann so lavwa…

Enn son finn, dous, tann tann dan lwin

Ekout bien

Penan ni bas ni tuiter

Mo pann bizin alim mo computer

Pou rod li lor facebook ou twitter

Mo pann bizin rod okenn aplikasion pou kominik avek li ouswa

upgrade mo browser

Mo pann bizin marse pou rod li ouswa met randevou akoz li enan

bokou visitor

Li sifi zis kominik ek li pou mo ENTER

Ek poz mo doleans in the CENTRE

Dan silans mo leker mo resers twa

Dan silans mo leker mo reklam twa

Bio

Joseph Ezechiel Collet

Oriziner enn ti vilaz dan l’est Rodrig apel Trois-Soleil, li amoure ek lar oratwar depi laz 16-zan ek sa fer 14-zan karyer ki li pratik so lar a plin tan ek ki linn fer enn non dan bann zil losean indien sou non Jeckel Ze Angel. Li enn oter-kompoziter, slamer, komedien, santer, prof teat ek scenaris. So pasion se lekritir pou veykil bann mesaz ki koz spesialman lor lamour ki iniversel. Lar inn trap li atraver enn don ki bondie limem inn desid pou ofer li.