À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Sertin blesir

Difisil sikatrize

Mem si nou esay swagn li

Li kontinie soupire

Enn regar perdi lor lorizon

Enn leker transperse par latrahison

Enn koktel soufrans

Finn disip mo granper so lesperans

Pou enn dernier retour

Lor so later natal

Sa ti enn kou fatal

Kan li koumans rakonte

Ou nam desire kan sa lam

Emotionnel traverse

Lekor frisone

Ou bizin zis ekoute

Li pann dimann sa

Zot finn tir li laba

Gran Mama

Gran Papa

Pann kapav fer nanye

Kriye, plore

Sa pann retourn li lor so zil

Isi li finn touletan senti li en ekzil

Malgre so ti lavi pezib dan Cassis

So ti boulo debarder dan Porlwi

Granper so leker ti touzour atase

Ek so paradi perdi

Ek so 70 banane

Zordi li pe viv lot kote dilo

Dan lavil so bann bouro

Parski isi Moris

Bann zilwa

Ti touletan deryer soley midi

Kouma enn dikton dir

Preferab to rest pre ar to lenmi

Ki ar to bann swa dizan zami

Laba pa ti ena traka

Gran papa ti travay

Dan eskplwatasyon kopra

Gran mama ti pe lav so bann dra

Anba sa lesiel ansoleye

Lagete ti reyone lor zot figir

Aster ena zis souvenir

Pou reviv enn lavi

Ki finn perdi

Gran mama finn ale

Gran papa finn swiv li

Mo granper ankor pe espere

Pou retourn dan so paradi perdi

Zot finn vann so lidantite

Zot finn bril so rasinn

Zot finn fer tou pou ki zot rest

trankil

Kot mo granper sorti

Presion sosial pa ti ena so plas

Isi divizyon inn amenn lager rasial

Laba pa ti bizin kas

Sakenn ti partaz seki li ena

Zot ti enn pep solider

Isi zot finn amenn enn lavi soliter

Manze pa ti manke

Isi akoz enn bouse manze

Kapav gagn maltrete

Bann seki finn mont lor bato

Kapav dir komie finn zet lekor

dan dilo

Bann seki finn mont lor bato

Kapav rakonte kouma finn tret zot

kouma zanimo

Seki zot inn les deryer zot

Zame pou retrouve

Pena okenn antidot

Pou geri sa blesir

Ki ankor pe soupire

Zordi

Pou konpans sa soufrans

Zot finn swa dizan donn nou enn

rekonesans

Seki to finn brize

Difisil repare

Malgre regar, kritik

Nou pou kontinie koze

Kan nou pou kit later

Mem lapousier

Pou leve pou propaz

Nou zistwar dan leker

Bann zeneration fitir

Se avek enn leker lourd

Ki mo get mo drapo flote

Deryer sa kadrikolor

Ena enn pep ki ankor pe plore

Omaz a sa bann sagosien

Ki finn ale

Ki pann resi remet lipie

Lor Peros, Salomon, Diego

Sertin blesir

Difisil sikatrize

Mem si nou esay swagn li

Li kontinie soupire

Dan pli profon nou leker

Bio

Slameuse au nom de scène Ge-NYX, cette habitante de Roche-Bois aime écrire des textes plus au moins tabou… La poésie, c’est sa thérapie.