Mo inn gagn 20 an azordi. Mo enn zimaz. Mo rakont momemm avek mo linz ki ena so mark, mo telefonn portab dernie model, mo soulie grife… Sa bann zafer-la inportan pou mwa. Mo swagn mo look touzour. Se sa ki esansiel. Mo portab, so mark, so model bien inportan. Se mo lidantite. Mo enn dimounn piblik. Mo lor Facebook… Mo sagrin, mo etal li afi nki lemonn entie kone kan mo soufer. Eski parfwa mo santi ki ena enn lot mwa ? Mo pa gagn letan pans bann zafer koumsa parski zame mo tousel. Mwa, mo ena mo portab.

Mo kone mo existe parski li sone ek mo gagn mesaz. Eski a 20 an mo kapav amoure ? Bien sir, si amoure le dir sexy. Mo bizin sexy e ena enn sexfriend. Si mo pena enn minn, mo touzour kapav gagn enn sexfriend dan sa bann sware kot to peye pou zwenn dimounn. Mo pa kone si bondie existe ou pa. Li pa importan pou mwa, bondie li parey kouma enn Premie minis. Mo kone li la – li sirman desid bann zafer – me mo pa santi so linportans dan mo lavi.

Mo pass boukou letan lor Internet ek divan mo televizion kan mo pa lor mo portab. Sa permet mwa relax. Fode pa tro panse. Get bann adilt. Zot telman panse ki zot nepli kone kouma pou fer kiksoz. Zot trouv problem partou. Mwa mo pa kontan rant dan bann gran diskision. Enn lexanp, enn sel lepep enn sel nasion pa le dir gran soz pou mwa. Mo pa interese avek dimounn ek zot bann zistwar ‘bann’. Mo pa kone kouma dimounn lezot relizion viv. Li vre ki mo enn ipokrit ek mo dir ki tou dimounn parey. En tou ka, li pli fasil pou mwa ‘chat’ avek bann kamarad lezot pei ki koz avek mo vwazin. La, mo ankor pe aprann. Mo bizin gagn enn diplom, rod enn travay, swiv enn lot kour apre pou gagn promosion, aprann kondir, aste enn loto, enn lakaz, marie, gagn zanfan… Mo ena boukou proze. Mo pena drwa desevwar personn. Antretan, mo bat bis mama-papa. Apre tou, se zot devwar okip mwa sirtou ki zot atann tan de mwa.

Mo kone mo ena bokou defo. Zot kritik mwa, zot dir mo lir dis magazinn football ek lamod. Me eski zot dimann zot kifer mo pa interese avek zot bann gran deba ? Ki lintere sa lemonn-la ena pou mwa avek so bann konfl i, so bann lager ek so bann palab ! Kitfwa mwa osi pli tar mo pou vinn parey kouma zot me asterla, less mo pass mo letan okip mo seve, mo linz, mo bataz, mo rezo sosial lor Internet. Mo enn prodwi mo lepok parey kouma sak zenerasion ena so lepok. Donk pa bizin tro sever dan to zizman lor mwa. Mo ena zis vintan…