Alor ki Festival International Kreol pé donn bal, monn envi repran dan tit expression poet seselwa Michel Savy pou dir mo pasyon pou mo langaz.

Kan mo pa mett ves
Pu mo all lames
Pa kwar sa to pesé
Trankil all fer to lasyes
Sa a fond mo mot ankesé
Nu lidantité ankastré

Ant to mot ek mo mot
Ena enn lamor
Kot intercalé mo lekor
Vers lib kuma enn tor

Monn ekrir li
Monn aksepté li

Li nepli lé mwa
Li dir li ena so prop lafwa

Li pé navigé lor losean so limazinasyon
Li pé voyazé partu li pé fer so evolisyon

Enn langaz ki pé kré enn lidantité
Enn langaz ki pé baloté ant bann ekstremité

Ant fransé barok ek lafaya ki sorti dan sité
Ant big respect et c’est comme ça qu’il faut parler

Radotaz pena lankraz samem zot sorti tu kalité gornaz
Zot dir bwar enn koka kan fini manz roti maraz

Zot kwar kumsa ki fer maryaz lorizon kontrer
Kuma dir ena bon ler pu fer erer

Bann mové deler avek enn bon karakter
Bann revolisyoner ki fer return an-aryer

Get byin
Truv lwin
Donn kudpwin
Grat tu makiyaz
Less nu langaz
Fer so vwayaz
Pran laz
Gagne cogné ar miraz
Parey kuma enn lidantité dan baraz
Kinn mal kalkil so reglaz
Parey kuma enn kiltir zoli ziss lor paz

Par phase
Enn langaz
Ki pena lakaz
Pé tini so laraz