À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Dan lavi, mo’nn bien trouv zekler

Ziska ki mo’nn trouv li kler

Ena inn dir mo fou, mo sik sike

Parski mo ti zis anvi mo ti zil trouv sikse

Abrakadabra!

Realiz mo rev

Realiz bann swe ki ena lor mo lalev

Mo anvi ki bann zenes kouma mwa epanwi

Ki ledikasion ranplas bann fet dan lanwit

Trap kaye bizin nepli enn lanwi

Trap sigaret bizin vinn enn lennmi

Mwa ki’nn frekant klas, mo’nn konn valer lekol

Mo enn anbasader lazenes, ki anvi zot amenn bon rol

Kifer dan laboutik pa vann plis materyel skoler?

Kifer twa pov piti to zis fer mama ankoler?

Kifer to pa rev pou vinn ot soz apart enn somer?

Kifer kouma mwa to pa rev enn zil Rodrig meyer!

Ledikasion se lakle

San ledikasion to pou lake

Gom ek kreyon bizin vinn nou meyer zami

Oriant lor kaye pou apre ed nou fami

Pa zis kalkil plane ziska larzan fini

Fer inpe plis matematik pou to konn laprantisaz infini

Mo pa anvi zis enn demo

Mo anvi prev

Mo anvi enn zil Rodrig de mo rev

Anou fight pou upgrade

Pa nek swiv kouma sev

Etidie pou asir la relev

Etidie pou ou profeser fier de so zelev

Zenes larg boutey ek kann

Aret grate, santi, sik kan

Kan to kamwad pe aprann aret sikann

Devlop bon mantalite ek ekout mo slam

Ledikasion se lakle,

Sans ledikasion to pou lake

Mwa mo enn zanfan ki reve

Mo rev abstre me mo kotwaye realite

Mo’nn gagn frotman ek lafatig akoz samem mo’nn realize

Ki zefor bizin vinn nou kotidien

Lalkol, ladrog bizin brile sa bann par-semin

Bril tou lespri negatif pou mo zil aret sagrin

Lekor tipti me mo rev gran

Par mo slam mo pou pas a laksion

Mo rev se eradik bann tantasion

Sansibiliz bann zenn ki dan inaksion

E osi pou fer zot kone ki PUBG se zis enn distraktion

Dan lavi, mo’nn bien trouv zekler

Ziska ki mo’nn trouv li kler

Ena inn dir mo fou, mo sik sike

Akoz mo ti zis anvi mo pei trouv sikse

Bio

Louis Jean Hans Charley

Cet habitant de Piment-Reposoir, Rodrigues, est le leader du club de slam de la S’kool of Art, footballeur et «headboy» d’Ananias André Le Chou College. À 18 ans, il a déjà à son actif : deuxième de la «poetry competition» de son collège (là où tous a débuté) en 2017, champion de slam en collectif de la compétition inter-collèges des arts en 2019 ; deuxième de «Slam lor to portab» ; deuxième de la compétition interrégions «Spéciales vacances» ; deuxième de «Zenes montre to talent» en 2020, deuxième de «Ini kont VIH», et champion de «slam pou nou lenvironman» en 2024.