À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Mo frer mo ser

imazinn enn lanatir kot later arid kouman lapo enn vieyar

enn latmosfer ki fer nou ditor

lakord dan likou enn vera

loksizen inn vinn rar

Esey mazinn enn lesiel kot zanfan nepli kapav lans servolan

kot zwazo nepli kapav sirvole

kot fer so kouman dan enn volkan

Kot zanimo pe mor

imin pe mor ek laswaf

Wi mwa mo swaf

mo swaf sa letan kot lerb ti ver

ek siklonn ti 2 fwa par an

kan mo get mo lemond aster mo dezanpare

se nou aksion ki pe fer siklonn fer zanfan vinn san paran

Kan mo ti tipti

toul’tan mo ti dir ki sa se enn plas kot mo anvi rann mwa

me aster li nepli sa

sa nepli mo lanvironnman

Si se pa lafot zom

be dir mwa k’inn ariv nou dodo

dir mwa ki’nn ariv nou bann pie

dir mwa ki’nn ariv nou lamer

be dir mwa ki’nn ariv sa later ki ti fer mo lipie gri

dir mwa ki sa lafime ki pe fer nou lesiel grize

dir mwa ki fer ena batiman ki pe ranplas lafore

Mo zoli later

ble ek ver

pe koumans vinn pal

parski so zoli lamer finn vinn sal

zot bann bwar ek zot bann fet pe met plastik lor plastik

Klima pe sanze ek saler-la li drastik

nou later pe eklate

ek se akoz lasesres

to trouve nou pe mor be ki fer to pa sese

kan mo trouv pie pe briye momam mo sezi

Mo frer mo ser

imazinn enn lanatir kot later arid kouman lapo enn vieyar

enn latmosfer ki fer nou ditor

kouman lakord dan likou enn vera

kot loksizen finn vinn rar

Esey imazinn enn lesiel

ki kan to gete lafime inn ranplas niaz

kan to get bien lekolozi se zis enn miraz

Nou dir ki lanatir limem mama

eski to ena kouraz get to mama plor disan man

me so destriksion sa fer di-z-an man

ek lanatir li la depi lanwi de tan man

Sa fer dimal

alor dir mwa

eski to anvi enn later ki arid kouman lapo enn vieyar

Enn later ki pe koz nou ditor

kouman lakord dan likou enn vera

loksizen finn vinn rar

Bio

Jean Frederick Bégué

Du village de Quatre-Vents à Rodrigues, Zanfrederik, son nom de scène, est devenu photographe et slameur par passion. Multiple vainqueur de tournois de slam, il a remporté la compétition inter-régions «Spéciales vacances» en 2020, «Slam lor to portab 2022» et «Ini kont VIH» en 2023, et a été troisième de «Slam pou nou lenvironman» du Rotary Club à Bagatelle. Il fait partie du slam club de la S’kool of Art de Rodrigues.