À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Nou lavi li enn pies teat,

Kot nou zwe lamour lazwa lapenn,

Ki li bon li pa bon nou bizin debat,

Parski nepli ena meter an senn

Nou viv lavi kouma enn lekours

Kouma kikenn dan dezer ki pe rod lasours

nou viv dan nou prop liniver

avek bann fos persepsion

Olie viv pou trouv nou boner, nou viv pou pa

gagn desepsion

Nou panse nou kapav kontrol tou

alor ki nou sipoze viv ar feeling,

Nou touzour ekout bann gran manitou,

Kan zot koz lavenir li pran form enn warning,

Me mo pa pli spesial ki zot,

A enn lepok nou ti partaz mem defo,

lane inn pas ar mwa enn apre lot,

zordi mo leker inn gagn repo,

Avan letan ti traverse ti pe bez klak,

Zordi mo resanti so kares,

Mo ti perdi dan enn losean ki zordi enn flak,

Depi ki lavi inn met lor mo ledo palto lasazes

Nou lavi enn pies teat,

Kot nou zwe lamour lazwa lapenn

Ki li bon li pa bon nou bizin debat,

Me lasazes inn vinn mo meter an senn

Aksion

Kan rido leve lor to lavi,

Tou zafer enn kestion letan,

To bizin fer fierte to fami,

Repran lesouf to pa gagn letan

To ti bizin tann :

Mo zanfan Swazir to direksion,

Mo zis anvi to ere dan lavi,

Me an realite to tann:

APRANN VINN DOKTER FER FIERTE

MAMI PAPI,

To ti bizin tann:

Vinn meyer version tomem, to paran pou

toultan la pou siporte,

Me an realite to tann:

APRANN DEBROUY TWA PAR TO MEM

SINON KAN MO POU MOR TO POU FINI

LOR SIME.

Mo ti pou kontan ena lasazes dan mo lavi

adolesan,

Sa ti pou evit mwa bokou ditor,

Olie sa mo’nn konn stres ek bokou parol

blesan,

Kan mo exprime zot dir mo bitor,

Mo ti pou kontan ena lasazes

dan mo lavi adilt,

Ti pou evit pran bann desizion initil,

Mo ti pou abord li avek enn meyer latitid,

Me pa kapav blam enn pie sek alor

ki later pa fertil,

Ki litilite lasazes dan vieyes ?

alor ki to lavi deryer twa,

Kot li ti ete dan mo zenes,

Ofet personn pann partaz ar mwa,

Mo pou partaz twa enn sekre,

Kol li par la lor enn pans bet,

Lasazes nou tou pe kree,

Me a la baz li ti bizin transmet,

Non mo pa pe koz gonaz,

Mem si konsep la flou,

Pa blie se mwa ki saz,

mo pa pou met zot dan trou.

Transmet de zenerasion an zenerasion,

Se pou sa ki zot responsab,

Fason rann zot lavenir pli bon,

Se montre zot li pa insirmontab,

Partaz sazes ek matirite

se sa nou premie operasion,

Dan zardin zetwal kan zot tou konekte,

Koumsa ki gagn enn konstelasion,

Nou lavi koumadir enn pies teat,

Kot nou zwe lamour lazwa la penn,

Ki li bon li pa bon nou bizin debat,

Me la se nou meter an senn.

Bio

Lafleur Malade

Ivans Lafleur est un poète et slameur passionné qui exprime son art depuis ses années au lycée. Son talent réside dans sa capacité unique de transporter les gens à travers ses mots, grâce à son style narratif captivant en français et en «kreol morisien». Ses textes, tels que «Respekte Li» et «DS», reflètent sa sensibilité envers les femmes et ses perspectives sur la société contemporaine.