À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Enn gout, de gout, trwa gout

Timid-timid, li pa vinn enn sel kout

Me tanzantan, li araze

San fer kone, li nek kraze

Zet enn koudey lao lesiel

Plitar, tann dir lapli toransiel

Dan gramatin, pe trouv zekler

Ena lekol? Kouma pou fer?

Atann transpor pou al boulo

Fini tranpe ziska lezo

Ler rant biro, lizinn, santie

Strese, patron get twa gro lizie

Karo legim nek regagn sourir

Kapav kase, avoy lame tou fri finn mir

Laliann file, zwenn ar lerb bourik

Krapo, los, kourpa pe fer koustik

Kares flan montagn, al direksion lamer

Vers enn ti larm dan larivier

Me basin bien sek, dalo grinse

Me kot tou sa dilo-la ete?

Reyon soley tap lor sime

Sof ti delo, fer lafime

Monte, monte pli ot, li kit later

Res zis enn loder flote dan ler

Lakaz koule, matla tranpe

Pou ponp delo bizin koudme

Soulie, savat plin ar labou

Ena pou gagn tar pou randevou

Degaze, ena linz lor lakord

Rise, ploye, met bien dan lord

Ramas bilimbi, mang, frisiter

Kan soley revini, nou va refer

Zwazo, bebet perdi lakaz

Bizin trase pou trouv lot baz

Atann botan pou al rod ayer

Ti lespwar pou enn lavi meyer

Bann ki kontan so ti freser

Lor lapo, kan galoupe, fer gagn ler

Lezot anvlope dan pardesi

Kous-kouse anba parapli

Dan lakoler zekler, loraz

Gagn gro lager ek tou bann niaz

Atann inpe, nou pa tousel

Parski pre pou trouv larkansiel

Sofer fer sir, sime glise

Lipie lor frin pou pa derape

Brouyar epe, pa trouv divan

Enn ti pasians, pran to letan

Lanwit-lizour li rann vizit

Parfwa dousman, parfwa tro vit

Enn soulazman kan pez saler

Kot nou, kot zot, mem dan liver

Riye-plore, sote-pile

San li ki nou ti pou ete?

Li donn dilo ki sours lavi

Limem ki nou apel lapli...

Bio

Francesca Ducasse

Elle est enseignante de «kreol morisien» au primaire depuis 2012. C’est sa langue maternelle qui lui a donné l’envie d’écrire, et de faire de la poésie et du slam. Elle a eu la chance de participer à plusieurs événements autour de la poésie comme le «Festival Kreol», «Poezi Fam» et la Journée de la francophonie. Elle écrit aussi des textes en français. Elle partage un texte qu’elle a présenté à la «Zourne Langaz Maternel» en 2020.