À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Kouma nou santi li?

Letan

Eski nou’nn aprann kouma

konpran letan

sa enn zafer konplike

Ki nou tou ti pou kontan

ena li anplis

Me ki nou santi nou ena li

anmwins

Lekol mo ti aprann kouma lir letan

Gramatin mo pran mo tidezene

Midi dezene, kat-er dite

Tanto dine

Ler li ena so bann reper

Bizin ena bann reper dan lazourne

bann ti zafer ki amenn boukou

Bann latasman avek nou lazourne

Pou toulezour pa tom parey

Pou mo konpran kouma mo’nn

servi mo letan

Ki serti, mo ena tou sa letan-la

Me mo nepli kone

Kot linn ale, kot linn pase

Kouma mo’nn servi mo letan

Lontan dimounn ti pe atann

enn leternite pou

lafin lane vini

Zot ti dir, me dir mwa enn kout

Kan letan pou pase

Aster nou dir,

Me kot letan inn ale

Anou get sa ansam

Poz twa la kestion

Letan kot li ale

Kot sa nou bizin pase

pou gagn inpe letan

Napa kapav aste sa

Nou tou nou ena li parey sa

Letan li balade, li mars-marse

Pou gagn enn lide

Get dilo larivier koule

Kouma lapli tonbe

Letan soley pran pou li leve

Li parey sa

Letan li koumsa

Li kouma dilo, lapli, soley

Kas enn poz?

Non, nepli ena letan pou sa

Anfin, ena letan

Li la mem li

Se nou ki pena letan

Nou letan li fasone

skiplte, kre

par bann mouvman ek zes

nou fer tou lezour

tou bann panse ki nou ena

ek bann desizion ki nou pran

Enn zour

Mo’nn vir mo ledo

Mo’nn get deryer

Mo pa kone kot letan inn pase

Letan kot inn ale?

Tok, tok, tok, mo’nn tap

laport letan

Linn ouver so laport lantre

Ehh! Kot tonn ale ta?

Tou dimounn pe rod twa

Pe rod twa anba lili,

deryer larmwar

Pa pe trouv twa, kot to ete

Mo lamem mwa

zot ki pa pe trouv mwa

Nepli kotway mwa dan zot lakaz

Dan zot travay, dan zot foyer

Mo lamem mwa, mo pe dir twa

Si letan vremem li ti enn dimounn

Mo ti pou demann li so lavi

Lor kouma zer mo letan

Pou mo kapav servi li bien

Napa gaspiy li boukou

Pou mo kapav viv pou momem

Ek pou lezot

olie viv pou bann demann

ki nou zenerasion, nou lepok

ekziz nou

Pou mo kapav respire

san traka, zero fraka

Pou mo kapav repran mo letan

pou mwa

Me mem sa

Nou trouve ki sak fwa

nou poz nou la kestion

Me, letan kote?

Bio

Rebecca D’Souza

Née d’une mère mauricienne et d’un père indien au Koweït, elle a obtenu une licence d’arts visuels en histoire de l’art du Maharaja Sayajirao University of Baroda, Gujarat, Inde, en 2021, et à la fin de l’année, elle est revenue à Maurice, où elle a travaillé en tant qu’enseignante dans deux écoles primaires. Depuis janvier 2023, elle occupe le poste de «Project Lead» à The Talent Factory. Elle vient de publier son livre, «89 Questions to the Moon».