À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Leve mo bann ser

Tro lontan nou’nn sibir an silans

Inn ler pou ki nou lapel rezone

Anou met nou armir: Nou kouraz

Nou lafors Nou lawva

Pou montre kot nou apartenir

Tro lontan nou’nn res dan sa lobskirite

Ki’nn dire ena plizir siek.

Nou nepli pou res dan nwar

Inn ler pou nou alim nou flanbo

Pou nou al ver lalimier

Parski nou bann gerye

Ki montre nou bann valer

Pou kas lasenn

Kont bann prezize,

Anou defie sistem

Pou konbat linzistis

Ek pou viv plis an sekirite

Anou tis enn latwal

Pou ki nou drapo anvole lao

Pou montre solidarite

Ini par nou lavwa

Anou montre ki nou ena odasite

Avek nou bann mo

Nou pou ekrir enn parol

Ki pou amenn nou ver nou liberte

Parski nou nepli bann kondane

Bio

Vinita Hoolash

Pasione ek lavi, li retrouv bote dan poezi ek sians. So sourir ekler tout lespas ki li ete avek so lazwa deviv.