À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

To kontan to pa kontan, liver inn vini,

To’nn bien bwar nou disan aster to ver inn fini,

Nou’nn pez nene bwar delwil nou’nn bien tini,

Me li tris ki zis dan difikilte ki nou pep ini,

Tro lontan nou’nn kas enn poz nou’nn get dan figir,

Donn twa tou se ki to bizin pou menas nou fitir,

Enn sanzman li neseser kan nou pe al a la deriv,

Zot ankor pe vann paradi dan lanfer nou pe viv,

To kontan to pa kontan liver fini vini,

Pandan tro lontan nou tou nou’nn pini,

Tro bokou promes maxi ek aksion mini,

Tro lontan nou’nn deryer midi,

Kouma Gabi se ki’nn al rod lavi inn perdi li,

Nou ti santi nou inpwisan me nou pouvwar inn revini,

Dan to bolid to ti santi twa kouma enn zean,

Nou gete si dan lakok pistas to pou afront vag losean,

Lor telefonn lavwa pittbul me devan mikro to tiktike,

To pou travers karo lalwa, ek lalwa li tiktike,

Nou pa’nn blie to bann predeseser me to’nn repous bann limit,

Zot pa ti bann lexanp me zot ti sagrin nou enn tigit,

Mo pa pe kriye viktwar tro vit, mo pe zis swiv enn lozik,

Okenn Morisien nepli kapav dir li pena enn ex toxik,

Initil aste nou to larzan nepli ena valer,

Lakwizinn inn fer pou kwi manze pa pou prepar nou maler

Inn ariv ler pou rann kont nepli kapav fer parabol,

Mo pou get sa ek enn pla nachos ki mo pou «Dip»

dan guacamol,

To kontan to pa kontan liver inn vini,

Pouvwar dan nou lame to regn inn fini,

To pou aret sot-sote anba to lipie nou pou tor tou resor

Mo pou vot pou mo liberte ek nou pou… BLD.

Bio

Ivans Lafleur est un poète et slameur passionné qui exprime son art depuis ses années au lycée. Son talent réside dans sa capacité unique de transporter les gens à travers ses mots, grâce à son style narratif captivant en français et en «Kreol Morisien». Ses textes, tels que «Respekte Li» et «DS», reflètent sa sensibilité envers les femmes et ses perspectives sur la société contemporaine. Il est aussi ambassadeur de la Coupe d’Afrique de slam poésie à Maurice.