À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Li gagn to traka kan to pa manze

Kan apre enn ler to pa ankor rantre

Kan to pe asize tousel dan to kwin ki to pa anvi koze

Kan to malad ki to lafiev pa le tonbe

Li gagn dimal kan to plore ki to leker inn kase

Ki to nepli le manze

Ki akoz intel to pas lazourne boude

Kan to rebel akoz bann kam to pe frekante

Li pas so letan rod fer twa rezone

Kan twa zom/mari akoz vis

Zoue, ladrog

Ek boutey to ape lev lame

Ki apre boulo to pe krwar zis to tousel fatige

Alor ki li dan travay ou dan lakaz to latas ape double

Ek bien souvan akoz enn lot fam

10, 20, 30… an apre pou inpe nouvote

Ek inpe plezir tonn pare pou detrir to foye

Apre tou sa lane li ankor pe vey lor twa malgre tou sala

samem so kouler seve in arzante

Dan to tourman linn sey donn twa bon konsey

Li depann twa kan to pena personn pou get to zanfan

Ek dan so karay enn de bann rar plas ki to resi reviv sa bann gou dantan

Me malgre tou seki kapav panse

Li ankor ena enn letiket ki to inn met lor so ledo

Ki enn fam bizin konn so plas

Ki si li anvi exprim li dan

So douler, so tristes

So traka ek so santiman

Swa li fol, swa li pi...

Swa li enn serpan

Ou li atoufer

A kan pou abat patriarka?

A kan enn fam kinn pran desizion pou li divorse

Ki li pa santi li pre pou gagn zanfan

Abiy li pou li santi li zoli , bien dan so lapo

Ki linn anvi konsakre letan so travay ou li pann anvi marie

Kan eski twa… wi twa... sosiete pou aret zize...?

Finn fini ariv 2024 me

Ankor pe fer palab

Ankor ena zom ki panse fam so plas dan lakaz

2024 me zot pa ankor trouve inn ler pou aret malmenn fam

An 2024 to pa ankor sanz to mantalite

Garson premie lo

Tifi deziem lo

Me les mwa dir twa ki lespwar pann tom dan dilo

Ansam ZOM/FAM san okenn disparite

Nou ankor kapav rann

Nou koup, nou fami, nou lavi meyer

Ek ansam ek la fam fer nou fierte flote lao-lao

Bio

Élodie Calou

Mère célibataire, chanteuse, slameuse et mannequin pour les femmes rondes, elle a participé à de nombreux concours de chants. Elle est aussi auteure et compositeur, et rêve de faire un single. Sa devise : «Pa fer to prosen sa ki to pa pou kontan fer ar twa.»