Merkredi dan liniversite Moris, mo larm ti dan rebor mo lizie. Sa pies teat-la, «Fouka Zame ti Pagla», li finn pran mwa dan mo trip. Li finn sakouy mwa kouma pie mang dan siklonn. Nou tou ena lafoli dan nou. Me lakel pli danzere? Lafoli enn idealis, lafoli bann viktim lavi, zot prop fami? Lafoli ladrog, lalkol? Lafoli «pa mwa sa, li sa»? Ziska kotsa enn dimounn li pre pou kraz so prosin pou so prop lintere, manipile? Bokou spektater inn resanti sa dan zot lekor, zot lexperyans imin.

An plis, Thierry Françoise inn resi met bann konba Dev Virahsawmy dan sa bann dialog-la. Lor literasi. Swadizan tou dimounn konn lir ek ekrir. Me mo kone, Dev pa ti dakor lor la, e mo donn li rezon: nou tou konn kikenn ki pa konn lir. Meter-an-senn li finn osi met an valer dan enn fason siptil langaz kreol, bann expresion kouma «joukal», «fanor», fer sirandann.

Mem dan kostim… ena enn mesaz: bann misie zot pizama ti roz, pou bann fam, ti ble… Diab dan detay…

Lor la, si ti ena inpe amoure dan lasal, zot ti pou kapav inspire pou frekante ek sa zoli dialog-la. Kan Mily pe dir Yuyu to mo «lonbraz inkandesan», Lalinn ek Soley finn dans sega tanbour dan mo leker.