À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Pe dimann nou fer zefor

Ziska lamor rint lekor

Pou swadizan lavenir

Selman nanye pa pe sir

Zot privilez pa touse

Kouma Lavierz li sakre

Tann dir fode zot dan bien

Pou pa gagn anvi kokin

Napa fer nou pran lakoler

Sanz sa lalwa dominer

Napa fer nou pran lakoler

Zanfan mizer pli soufer

Enn ti kouraz pa donn nou

Pou nou resi manz nou kou

Enn bon rezon pa donn nou

Pou pa galoup kot loulou

Enn soulazman pa done

Pou pa kriye ler sere

Enn bon lekzanp pa trouve

Kot gouvernman sakrifie

Napa fer nou pran lakoler

Sanz sa lalwa dominer

Napa fer nou pran lakoler

Zanfan mizer pli soufer

Zis ek laswer travayer

Zot pou swegn lekonomi

Lor latet gro milioner

Napa oze fer profi

Bizin dir zot franfran

Napa gat nou Repiblik

Si pena etik dan disan

Napa vinn fer politik

Napa fer nou pran lakoler

Sanz sa lalwa dominer

Napa fer nou pran lakoler

Zanfan mizer pli soufer

Ti promet nou bouke roz

Tir nou lame anba ros

Dan plas pe devid nou pos

Pikan pe tas dan lagorz

Lepep pe fer overdoz

Pa gagn letan kas poz

Pe obliz li trime kas so ledo ziska vie

Napa fer nou pran lakoler

Enn gran erer fode pa fer

Napa fer nou pran lakoler parski nou mem ki zot anplwaye.

Bio

Auteur, compositeur et interprète, il trace sa route.