À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Mwa, Mo’l’art

Mo kontan bann gro lar

Mem mwa mo soular

Parski lar li lao mo latet

E mwa mo zis anba so lafnet

E twa to lar

Li parey ek so lar

Mem si to lar pann fer lazol, prizon

Ek so lar pa sort dan soley so reyon

Avan mo ti soular

Aster mo soul, lar

Avan mo ti pass pou vantar

Aster mwa ki vant art

Parski li gran nou art

Twa, dir mo granwar

Lartik ki long, zot dir

Me mwa mo lar tik dan sir

Alor kontign rakont art

Twa ki konn art

Les krwar twenn konar

Les koze, les pase

Lespas li plin ar vid

Parey nou les pas li ranpli ek dimoun avid

Les koze, les zaze

Pozitive, pa araze

Me si bizin, taye raze

Pas to sime, taye ale

Dan nou lam nou enn bann fetar

Dan lazwa nou pou kontign fet art

Ar mwa ar twa ar li ar nou

Tarr

Pankor tar pou trouv nou boner

Kont lor lar pou sov nou loner

Nou ena lokazion pou pran par, par nou lar

Dan sanzma mantalite

Nou la pou propaz la kalite

Nou pa get laz ni kalite

Ni ras kouler, zis egalite

Nou met de lavan enn bann sonorite

Pou permet enn bann zorey ki merite

Pou tande ek pou ekoute

Kontan pa kontan, se twa ki deside

To le to pale, mo pale la pou rakonte

Dan pale mo vizaz mo lizie se mo larmwar

Kot mo gard tou mo larm ziska ki enn zimaz nwar

Pas dan koulwar mo servo

Ek ranpli mo lizie ar dilo

Ziska ler mo ti saz

Monn pran mo lafors dan mo bann mesaz

Mo figir inn ride, me pa akoz laz

Ziska ariv enn ler kot nepli ena fraz

Enn iltim konnri imenn inn fer debord mo vaz

Kinn kre la gout de larm kinn fer debord mo lizie

Ek kre enn debordma larm lor mo vizaz

Me mo lar linn relev mwa

Lespri dir mwa «repran twa,

Repran to plim ek to papie

Souy to dilo lizie ek repran to dikte

Al kontign rakont art»

Twa ki konn art, twa ki fet art, kontign vant art

Rekonsilie mo lar to lar so lar nou art

Mazine ki lar tik bann narko pou li pa vinn

narkotik parski narko tik lar!!!

Si tonn konpran napa pran kon

Parski kon pran sa... konpran?

Bio

Clarel David

Cet habitant de St-Martin écrit depuis qu’il est tout petit. Le monde des mots le passionne tellement qu’il a adopté cet art d’où il tire principalement son nom de scène «Mo’l’art». Exprimer sa poésie sur scène en slamant lui permet de s’évader et de se connecter à des âmes réceptives ! Pour lui, «le slam, c’est l’âme compétitive d’un poète qui va à la conquête de l’expression de l’âme». Ayant la poésie comme moteur et les mots comme acteurs, il est le gagnant de deux manches de la ligue de slam de poésie 2024 à l’Institut français de Maurice.