À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Mo’nn koumans ekrir-la, mo pa pou arete

Mo pou sezir sak loportinite

Mo pou fer enn manier to tann laverite

Lor seki deroule lor later an realite

Vremem li fer per kan to mazine

Komie zafer nou pa kone ki pase

Mo demann twa pret mwa to zorey

Tou zanfan akord mwa 1,2 segonn

Pa fer sanblan ekoute zis pou reponn

Ekoute kompran, fer to lespri rezone

Kan mo’nn anbark dan lavantir slam

Monn remark grander mo lam

Lekol finn touy mo kreativite

Me anfin mo finn konn mo rol, mo devwar

Par sa aktivite-la mo bann neronn inn reaktive

Mo dakor mo pena enn lavwa santer

Me mo lavwa pou bann ki dan laper

Ek kont tou ban san-ker

Linspirasion li vini dan ler

Les mo inspire

Les bann mo respire

Ekrir ziska mo transpire

Lontan mo ti ezite pou dir seki mo panse

Me zordi mo’nn deside pou mo partaze

Alor pa reziste, les mo amenn twa dan mo liniver

Fer enn bon moman ki mo pe observe

Mo ti a kontan to resi tande

Dabor kone ki mo pann vinn lager

Pann vini pou kas rekor

Mo pe fer enn zefor zordi pou ki dime pena remor

Mo’nn repran nesans

Mo lavi inn gagn enn lot sans

Mo prefer reviv mo lavi avan ki mo remor

Mo’nn gagn enn deziem sans pena mwa rann lekor

Non mo pann ankoler

Mo pou melanz kouler ek kré enn larkansiel

Mo pou fer lankr koule

Mo finn koul mo lankr dan lamer

Mont abord mo navir

Nou al dan sa lavantir-la ansam

Zis to akord mwa enn ti letan

Pou mo abord ek twa 1,2 size atraver mo bann text

Mo’nn koumans ekrir-la, mo pa pou arete

Mo pou ekrir ek ekrir ziska mo lame gagn kor

Mo pou ekrir ankor e ankor

Mo pou kriye pli fort

Se zis enn koumansman

Aster mo finn lans mwa

Bio:

Pouvalen Pareanen.

Ce Flacquois de 21 ans est slameur et poète en herbe. Il est déterminé à partager ses réflexions à travers ses rythmes sur une multitude de sujets. Il a remporté la deuxième place de la quatrième manche de la Ligue de slam de l’Institut français de Maurice en mars.