À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions sur la condition des femmes.

Labriz dan so seve

Li pa per pou valse

Lor bann vag ki danzere

Tanpet pa gagn letan fer fraka

Ek so larder li fer twa dans samba

Fam

Boukou finn sey anlev to kouronn

Ziska ler personn

Pa finn resi tir twa

Lor to tronn

Avek twa lete repran so saler

Liver ramas so freser

Zis enn ti labriz

Pou ranpli nou leker betone ar mister

To enn zoli tsunami

Ki less enn zoli dega lor nou sime

To vag nway nou ar lamour ek tandres

Mem si arive de fwa nou donn twa

Boukou stress

Avek enn sinp kares

To disip nou lespri an detres

Kouma enn zekler

To amenn lalimier dan marenwar

Kouma enn loraz

To pa per pou fer tann to lavwa

To sourir kontaminn leker

To lavwa degaz enn douser

To amenn boner

Kot ena maler

To redonn lavi so saver

Kan li koumans gagn enn gou amer

Fam

To enn siklonn san klas

To amenn divan lapli

Pa pou fer dimal

Me pou pirifie nou lam

To enn zetwal filan

Ki pase pou montre

A ki pwin to omniprezan

Ki to prezans li inportan

Fam, enn tifler fane

Ki repran so bote

Kan soley leve

Labriz dan so seve

Li pa per pou valse

Lor bann vag ki danzere

Fam

To enn zoli tanpet tropical

Bio

Slameuse au nom de scène Ge-NYX, cette habitante de RocheBois aime écrire des textes plus au moins tabou… La poésie, c’est sa thérapie.