À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Ki «bann» to apartenir?

Bizin swazire pou to lavenir

Partou ape get figir

Rod konn to relizion to kiltir

Get to kouler lapo, to seve

Konpare pou sey trouve

Ki sann-la to pli resanble

Pou kone ar ki to anvi marye-pike

Larealite, enn mari konplexite

Ki pa touletan kapav sinplifie

Dan to kaye

Pa les personn ekrir foste

Mo gran fami ti vinn lor navir

Zete dan larad kouma pouritir

Kout fwet mark figir

Pa ti kone kiete lavenir

Bann kategori pou zot lizie

Pa koresponn ar seki vre

Kifer nou invante

Pou deklar seki nou pa ete

Nou tou nou’nn melanze

Transforme pou adapte

Res zis pou fier seki nou ete

Ek lev paviyon lakorite

Lor bote to sourir

Zoli lespwar ape flerir

Dan moman progre kouma letan dir

Li donn enn direksion, enn fitir

Parski zot pa trouve

Inegalite pa pou efase

Mem li tap dan lizie

Zot vir latet zot pa gete

Kouma nou pou vinn mam-kole

Si larises to pa oule partaze

Si later to konfiske

Kriye tape, to pa pou fer nanye

Nou listwar enn blesir

De-trwa ti-mo pa ase pou desinn lavenir

Ena enn liv nou bizin ekrir

Pou ki zanfan dime kapav epanwir

Bio

Michel Chui Chun Lam

Linn dekouver plezir lekritir kan li ti adolesan. Li fasine par pouvwar infini bann mo ki permet nou rakont zistwar, kestionn nou realite, ek sirtou kontign repouss lalign lorizon. Sa lanvi dekouver ek konpran lasosiete fer li vinn zournalis, avan ki so parkour profesionel amenn li dan liniver kominikasion. Zordi li enn redakter freelance ki’nn fer lekritir vinn so gagnpin.