À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Lamizik

Sipozema

Enn lar mistik

Ki transport twa

Dan enn dimansion idilik

Finn pran enn tournan

Plito dramatik

Ki zis bon pou fer polemik

Kreativite inn perdi lorizinalite

Aster copy paste Ki pe fer ravaz

Vire tourne mem bataz

Enn ti beat pe bate lot kote

Nou pran nou avoy enn sante

Non li pann enn cover

It’s a new offer

Pa pou koz manti

Zafer la tas dan latet

Li fer twa bouze, zigile

Koumadir lever inn gagn kout disel

Me kan to pran enn kont bann lyrics To oblize develop enn

sens kritik

Nepli bizin pik zip dan lerin

Sipa al regle kont lor terin

Mo rod tou to defo fisik

Mo poz lor enn beat

Mo vinn enn terib

Dan lespas venn-katr-er

Mo fini gagn sikse

To kritik mo seve

Mo dir to pena ledan

To tret mwa boufon

Mo dir to resanble lapia

To dir mo ena lorgey

Mo dir twa aret met lorgey

To gagn mwa ti koson

Mo dir to pa bagne

Zafer la ale mem

Ziska li gagn enn gou rans

Nepli bizin dir enn bann ti koze serye

Pou fer leker enn fam bate

Nek dir li ki to ena BM

Ki to pou aroz li ar boutey red

Askip

«Elle sera raide dingue de toi»

Nepli bizin invit li pou kraz enn slow

Nek dir li roul matak

Pandan ki to avoy to lame lor li

Koumadir to pe donn li kout

Balye fatak

Anfin seki monn konpran

San vremem konpran

Si se sa lavenir fam dime

Mo pa kone

Pa fini

Bienvenu dans le déni

Kot enn zanfan sink an

Nepli konn kont enn ziska dis

Selma li pena problem

Dir ki li anvi kros to l.a.n.i.s

Sori si mo pe bles sansibilite sertin

Li zis enn realite ki nou viv o kotidien

Kisana pou blame

Kan bann parti konserne

Pou reponn twa

Kot monn fote?

Lamizik li enn lar lib

Ki ena so limit

Zenes zordi nepli en filt

Zot manier exprime

Inn evolye

Selma kouma nou dir

Pa tou koze ki bon pou koze

Lorla pena personn

Ki finn dir zot

Ki zot pa pe amenn bon rol

Pa tou ki dan mem panye

Ena pe avoy enn bann mesaz serye

Ki amenn lespwar

Dan lazenes zordi ek dime

Malerezma zot pena otan sikse

Lor rezo

Pli to fou

Pli to vinn popiler

Pli to servi to servo

Zot get twa traver

Mo zis anvi dir ki lavi

Kontinie mem si to pena ledan

Pa tou tifi ki galoup deryer bann zom

Ki roul BM ou ki aster boutey red

par douzenn

Non to pa enn vilin ti koson

Parski li ilegal fer roti ou chassive

Ek la ser imin

To ni enn lapia

To pena zaret ni nazwar

Pou viv dan dilo

Apre evit kap klas

Franse ek biolozi

Pou to konn inpe plis lor

to lanatomi

Ek definition bann mo

Koumsa to pena pou dir

Vini mo servo to lipie

Koumsa mo leker kapav geri

to ledwa

Pa get mwa

Mo konpran twa

Moem mo servo bouze

Kan mo ekout enn de sante

Son-la kav met twa dan trans

Selma li pena sans

Dir mwa enn kou

Dan plas nou servi lamizik

Pou kre bann mouton

Anou servi li

Pou rann zenerasion fitir

«moins con»

Bio

Géraldine Baptiste

Slameuse au nom de scène Ge-NYX, cette habitante de Roche-Bois aime écrire des textes plus au moins tabou... La poésie, c’est sa thérapie. Ce texte a été présenté au tournoi de slam à l’Institut français de Maurice cette année.