À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Dan douler ek linzistis

To pe donn valer bann ris

Aswar to lame ek to lipie atase

Leker transperse me to lespri li flote

Toulezour to pe manz ar li

Me parfwa kout fwet fer dipi

Dan to soufrans nwar, dezespere

To lam ape kriye liberte

Letan ariv ler, to reisi sove

Larm dan to lizie to pe galoupe

To retrouv twa tousel ek laper anvayir

Me pou twa, sa labrous-la, li to paradi

Alonze ek to lasier dan lanwit ki pe tonbe

Olwin bann lisien ape abwaye, tors bouro pe anflame

To ferm to lizie e to leker ape bat fol

Me to pe trouv bann anz avek zot bann oreol

To kouraz ek to lafors kouma enn baobab

Inn fer twa vinn enn lezand pou tou to bann sanblab

Boukou finn swiv to lexanp par inspirasion

Diskision ape leve pou labolision

Ant lapriyer ek lespwar

Fini marenwar

Liberte pli divan

To nom li Mangalkhan

Norbert Marcel