À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Enn zafer traverse, mo inspire

Mo pran enn bout papie, mo poz mo lide

Enn bann figir gete, ala zot dimande

Kan to vinn vie, ki to pou ete?

Avoka, dokter ouswa exper dan kontabilite ?

Mo kas enn poz mo mazine, pa kone kot sa pou ale

Zot gagn pou amerde, zot dir si mo kontigne

Pena lot sime, bare lakes mo pe al tase

Mo fer bann mo rime, liver kouma lete

Bann vizaz krispe, mo paran dir mwa bizin al liniversite

Al aprann franse angle, lerla mo pou ena enn sime

Pena traka pou gagne, gouvernman ki pou peye

Mo zis pe rod trase, pa forseman vinn enn misie

Zis pa gagn trape, ek fini anferme

Enn dialog mo'nn tande, trap vant riye

Ki pou vinn seki mo oule, mo zis bizin fer seki zot inn deside

Mo dir pena sime, pa zot ki swazire

Zot dir mo'nn emansipe, mo rebel mo fronte

Mo reponn san badine, mo lavi mo destine

Mo pou debrouye, mem si manke pa pou dimande

Mo inspire, mo koumans marse

Pa tro kone kot pe ale, me mo'nn deside

Mo pran enn bout papie, mo koumans desine

Enn zafer mo kone, mo pou fer tou pou realiz mo proze

Mo pa revolte, zis inpe amerde

Ki nou sosiete nek galoupe, pa pran letan apresie

Get lamer so bote, niaz so lezerte

Rod larzan kouma afame, koumadir biye kapav manze

Bio

Michel Chui Chun Lam

Linn dekouver plezir lekritir kan li ti adolesan. Li fasine par pouvwar infini bann mo ki permet nou rakont zistwar, kestionn nou realite, ek sirtou kontign repouss lalign lorizon. Sa lanvi dekouver ek konpran lasosiete fer li vinn zournalis, avan ki so parkour profesionel amenn li dan liniver kominikasion. Zordi li enn redakter freelance ki’nn fer lekritir vinn so gagnpin.