À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Kaya lam sakrifis

Kaya sakre mizisien

So lavwa san artifis

Enn sinbol pou tou morisien

So bann linspirasion sorti dan so disan rebel

So vizion sorti ver Samarel

Pou zom dan zil so parol an parabol

Pou fam dan zil so bann mo pa bat lakol

Kaya fer nou sant ek dans seggae

Gagn enn lagam lor sa melanz sega reggae

Seki rapel kirpip lotel de vil so lanbians

Lepep morisien vibre ek gagn enn seggae experyans

Enn zistwar revoltan

Enn son ki rezonn andan

Kan so lamizik vinn nostazik

Li sant lamour pou tou piblik

Kaya patriot paski kan lesklavaz inn vinn mizer nwar

Kaya sant song of freeman

Li ti touzour demann liberte

Fer rapel ki li ena enn pep ki so rasinn pe brile

Li ti dakor ki so kiltir melanze ek sa mem ti dir li batar

Linn montre sime lalimier kan nou ti dan nwar

Ek Kaya dir nou si frer touy frer akoz enn touk dilo

Sir ki nou pou sap dan pwalon pou bez dan dife pli lao

Kaya ti pe tro dir ek leta inn rann so lavi tro dir

Kaya so life pa ti fasil me li touzour sant pou so ti zil.

Akoz li ti rasta boukou inn dir li kontiye atann

Me li reprezant revolision pa pou nanye so group se Racine

Tatane.

So zarm pa ti so fizi mé ti so lamizik

Larm tou morisien inn koule kan linn ale

Ti prins inn mor dan prizon akoz enn bann ras kouyon

Me li ti enn lyon kinn ouver lizie plizier zenerasion

Kaya ti anvi tou morisien enn sel

Kont lanpir iniversel ki li ti lité

Sant lamour ek la zistis pa pou li tousel

Enn lape iniversel ki li ti pe demande

Kaya lam sakrifis

Kaya sakre mizisien

So la vwa san artifis

Enn sinbol pou tou Morisien

Bio

Blackwell Louis

De son nom de scène D Black Wizard, il est un jeune poète et slameur. Lauréat de plusieurs tournois de slam, champion de slam national l’an dernier, il a représenté notre île à la Coupe d’Afrique de slam en 2023. Il a su se démarquer grâce à des textes qui traitent de divers sujets, avec une note particulière pour les textes engagés sur l’environnement et les droits humains.