À l’heure du tout à l’image et du buzz sans suite, «l’express» souhaite faire découvrir la plume de poètes, de chanteurs, d’écrivains et de tous ceux qui jettent leur âme sur le papier, et qui mettent en mots des réflexions profondes.

Disab lor enn laplaz

Volkan dan le paraz

Boutbout montagn dan tou peizaz

Se pa zis to lakaz e se twa zilwa

E eski to sa! vremem li pou twa zilwa.

Zilwa !

wi twa, to pe anvi lemond tann twa

Tann lo lavwa kan pe dir

ki to zil pe raptise e to bann laplaz privatize

Tann to leker plor tou so larm

Parmi enn pep kinn fini zet preske tou so zarm

To anvi lemond tann to lam reklam respé

Pou to kiltir zilwa! paski to zil sa

Zilwa !

wi twa, zot pe dir twa atann twa

Atann, to zil zoli kav amen ankor plis touris

ankor plis dimounn ris

Atann twa zot pou fer developman

Pou avoy larzan ar to ban dirizan

me atann twa de tou.

Dir twa atann twa!

to kontan atann twa, depi lontan to pe atann twa.

To pa pe defann twa. Atann twa.

Zilwa wi twa!

kifer pa pe tann twa

Pe tann twa, kan to laforé pe disparet parsle an monokiltir ou an aparteman parfime de lixir

Pa pe tann twa kan to kiltir zilwa

Pe aliene alete par loksidan lor to tele

Ek tou to bann lezot lekran.

Kifer pa pe tann twa zilwa, to pe dormi ou kwa.

Pa blie tonn ne anba Soley twa alor revey e relev twa.

Zilwa !

wi twa, to bizin aret atann la

Aret atann led de to ban bouro

zot dan zot buro pe get twa mor deryer baro

e to p dir zot bravo. To pa bien zilwa !

Aret atann met enn move avek bann lezot zilwa pou trouv enn

solision ensam tou tipti leta insuler paski zot problem li similer

To bizin aret atann paski travay inn komans fer

Sak zilwa ki konpran ki lanze, ki danze, ki bizin sanze ek ki pou propoze

zot kone ki bizin fer an tan ki zilwa.

Zilwa wi twa, to pe anvi lemond tann twa

Zilwa wi twa, zot pe dir twa atann twa

Zilwa wi twa, kifer pa pe tann twa

Zilwa wi twa, to bizin aret atann la.

Zilwa wi twa. Mo espere tonn tann mwa.

Bio

Blackwell Louis

De son nom de scène D Black Wizard, il est un jeune poète et slameur. Lauréat de plusieurs tournois de slam, champion de slam national l’an dernier, il a représenté notre île à la Coupe d’Afrique de slam en 2023. Il a su se démarquer grâce à des textes qui traitent de divers sujets, avec une note particulière pour les textes engagés sur l’environnement et les droits humains.